HaPpY biRThDAY 2 JojO

** العام مثل هالوقت كنت مسويه اكشن بالعايله لويه و خبه و الكل على اعصابه بصراحة انا عن نفسي مادري شنو سويت سبيتهم هاوشتهم صرخت بجيت وايد اشياء الحمدالله اني ما اذكر منها شي إلا شغلات بسيطة و كل ما أذكرها احمد ربي على نعمة النسيان و أقول شلون الحريم اييبون على 5 و 6 يهال مشالله عليهم و على ايام اول كانت توصل 12 .

والقهر ان بعد كل هالمعانات كنت آخر وحده اشوفها اسملله عليها لما شفتها حسيت بشي ثاني شنو هالشعور الغريب صج اذا قالوا قلب الأم و حب الأم حق عيالها والله الواحد مايتخيل هالشي إلا بعد مايصير له و يعيشه .

يتنا جوجو و ماخذت قلبي بس خذت قلوبنا كلنا يمكن عشان انا ترتيبي اصغر اخواني مع اني بكمل ال 31 انشالله بعد جم يوم بس الكل كان يقولي ياهل يابت ياهل :(

اليوم عيدميلاد جوجو صارلها سنه معانا و لما يقولون لي انشالله تشوفينها عروس مادري ليش تيني البجوه و بيني و بينكم مابي احد ياخذها هذي بنتي حياتي ، دايما كنت اسأل نفسي اشلون بكونون عيالي شلون شكلهم شيبهوني ؟ نفس حركاتي ؟ كنت اتمنى اني اشوفهم و الحمدلله كانت و راح تظل اغلى شي بحياتي

سويت لها عيد ملاد يوم اليمعه قبل عيدميلادها عشان المدارس و هذي كيكتها طبعا اهي ماتدري وين الله قاطها بس اهم شي استانسوا اليهال

ادعوا ان تكون بنتي بارة فيني و الله يجعلها من الذرية الصالحة يا رب

لازم يعكرووون مزاجنا من صباح الله خير اففففففففففففففففففففففففففف

** لأن الجو حلو فالواحد لما يقعد الصبح يقوم و اهو مستانس حتى لو دايخ و فيه النوم ، يقوم ياخذ الشور ويصحصح " و نصيحة للبنات

قبل ما تطلعين من البيت اخذي كوووب فيه ماي حار تسلي فيه بالطريج طبعا شربيه عالريج " وين وصلنا ليييه الشور تالي ميك اب

خفيف و تحس ان الدنيا حلوه و الدوام راح يخلص بسرعة و نطلع من البيت و نسمات الهواء العليل تداعب حيجابييييييييييي و ابتسامة

شقاقية مرسومة على ويهي اطلع من البيت لي الدوار لي الإشارة انصدم بالواقع المرير الزحمة صاكة إلى ماله نهايه بيتي بالزهره

دوامي بالخالدية ليش اقعد بالسيارة ساعة الشارع واقف حمرتي راحت من كثر التحلطم الشريط سمعته كله و خلص الوقت طاف دشيت

بمرحلة التأخير 7:30 الشارع واقف 7:40 الشارع واقف 8 الشارع واقف وصلت الدوام الساعة 8:10 انا طالعة من البيت الساعة 7:15 تخيلوا من الزهرة ليي الخالدية هدومي تعفست مزاجي اخترب والسؤال كالتالي من المسئول عن كل هاللويه ؟

و لييي متى راح نعيش في هالمأساة مع العلم ان مع كل سنة الزحمة تزيييد و السيارات تزيييد و ساعات التأخيير تزيد و يزيد الخصم

نبي حل .....

- و كلمة حق كل واحد و وحده مسئول و عنده موظفين تحته " الرحمه حلوه ياقدعان ماله داعي النفسية و تعيشون الدور على روووسنا

ترى ماكو شي دايم واحلى شي بالدنيا ان الانسان يكون له سمعه حلوه و ذكر طيب بين الناس و الكل يحبه مو يتف و يسف فيه

يعني ليش لما اصير مديره امر عالموظفين ما اسلم و نفسية و حالتي حاله و انا مادري وين الله قاطني " ويييع




- إهداء حق كل موظف و موظفة لايعة جبدهم من مديرينهم .. على هالجو الحلوووو اندووورا سالسا :)

I L TETTO

** مساء الخير شلونكم و شخباركم ...

- طبعاً انتوا تعودتوا علي بس احن و اتحلطم بس اليوم السالفة غير ..

رحنا انا و ريلي و بنوتي حق مطعم ايطالي يديد توه فاتح في مارينا ويفز .. اهو صغير و لما دشينا و ماكان فيه إلا احنه

مادري ليش كل ما اروح مع ريلي مطعم اوديني مكان ما فيه ناس :(

المهم دشينا ماكو احد المطعم صغير جم طاولة بس المطعم ايطالي بس اللي يطبخون كلهم هنود و مادري شلون صايرين المهم حسينا

انه الطعم طلع مألب و طاح بجبدنه طلبنا مقبلات و مين دش " اهم شي اللغة " و بنتي تحن صكت راس الويترز مساكين ماندري شفيها

المقبلات كانت : جكن ونقز " حقي طبعا انه اموت عليه " و مكس سي فود " حق الوحش الكاسر اللي معاي " و المين دش كان رفيولي

ماشروم و دياي و وايت صوص " اتعب عاللغة " صراحة الأكل كان مو صج حدة لذيذ و خصوصا الونقز عليه صلصة تينن و حتى السي

فود وايد ستانس علية ريلي المكان يبيله يمعه يعني اللي يروحون من 5 و طالع او بنات ياخذون راحتهم ايه نسيت شي كانوا حاطين رمكس

مو صج الأغاني حده كووووووول سكوووووول ...

بس الحلو ماجربناه طلبت كريب بالكاكاو بس قالي ماكو مو طابخينه اليوم " اللي يدل مكان يبيعون فيه الكريب بالكاكاو قولولي "

يالله بالعافيه اللي بيروحون انشالله يعجبكم ادعولي مو تدعون علي :)

لا حياة لمن تنادي ادري

** قبل يومين كنا نسولف بالدوام و إدارتنا فيها 4 شباب بس واحد منهم متزوج و 3 للحين ، و من ضمن السوالف يا طاري السفر

جان يقول ماحد منهم ايه انا حتى لما اتزوج لازم اسافر مع ربعي @@ انا جنه واحد صاكني طراق مو من كلامة لا ادري وايد

ناس تسافر بروحهم بدون حريمهم بس استغربت من طريقة تفكيره ان من قبل حتى ما يتزوج حاط حواجز و مخطط لحياة خاصة فيه

يعني لازم في وقت له سفرته مع ربعا مادري شنو ؟؟ ولما قتله انت ترضى ان مرتك تسافر بروحها مع صديقاتها جان يقول طبعا لاْ

يا سلام يعني انتوا عادي بس اهيه لاْ ؟؟؟ ليش

- تصدقون لو كل واحد قبل مايسوي اي شي يحط نفسة مكان زوجته او العكس بالنسبة للحريم جان قلت نسبة الطلاق 90 %

- سؤال : لما المره تحمل و تولد و تربي و تدرس و تداوم و توجب اهله و تجابل البيت و حضرتك متخمر بالدوانية ولا بالقهوة يعني

شنو الشي اللي ذابحك من التعب و تبي تسافر تغير جو و ترتاح منه ؟؟

- مساكين احنه يالحريم و خاصة اذا البنت طاحت بريل مايقدر ترى صج شي بايخ اذا الواحد ما قص الحق من نفسه ، يعني شفيها اذا

خذيت مريتك يومين غيرتوا جو .. و شنوا الشي او المكان اللي بتروحله او بتسويه و ماتقدر تسويه معاها يعني اكيد شي في خرابيط

و اذا نوعكم تتمللون من ويوه بعض روحوا مع قروب ثاني يعني روح انت و صاحبك و مرتك و مرته ، تسنعوا شوي بسكم يا شباب

قز و لويه هيعوا ترى والله عيب و حرام اصلاً في حديث عن الرسول " عليه الصلاة و السلام " خيركم خيركم لأهله " و " كلكم راع وكلكم مسئول عن رعيته "

باجر اذا الله سئلك ليش مسافر و مخلي هالمسكينه بروحها شتقوله ؟ ها شنو ؟ اهي ماتونس ليش ماخذها ؟

- نصيحة للمقبلات عالزواج " اللي اوله شرط آخره نور لازم تقوليله انج ماتحبين سفره مع ربعه من قبل الزواج

ونصيحة يا بنات ترى صج هالشي يحر و مو هيين تكلموا في الأشياء هذي قبل الزواج و ترى هالشي ماله علاقة بالثقة لاحد يقول عادي انا واثقة فيه الثقة شي و هذا شي ثاني . تدرون ليش لأن الريال من تاخذ ريله على السفر بروحه عقبها ماتقدرين توقفينه .

** كل وحدة ريلها يخليها و يسافر مع ربعه تقول وراي " يارب اضيع جوازك و تنشق جنطتك و يكون اسمك مثل اسم واحد ارهابي مطلوب و يحققون معاك 18 ساعة و تتعرجب فيك الطيارة و لما توصل ايبوقون فلوسك و يطلع الفندق خايس وتتسمم و تقعد طول الفترة بالفندق مو قادر تطلع و ترد و اقعد اتشمت فيك 7 سنين جدام يا قادر يا كريم "

رفعت الجلسة

للأمهات العيزانات

** كل عام و انتوا بخير مرة ثانية و هذا البوست خاص حق الحريم اللي عندهم عيال و يبون اسووولهم قرقيعان و ليلحين ما سوو شي مثل

حالتي :(

هذي بنتنا تسوي شغلات حلوه حق القرقيعان اللي يبي طلبوا منها sweetyq8.blogspot.com و بعدين انا مسويه معاها دييل

كل ما اييبلها احد تسويلي واحد فري حق بنتي لوووووووول " الحين البنت راح تنصدم " ..

كل عام وانتوا بخير

** مبارك عليكم الشهر مقدما وانشالله ينعاد عليكم بالصحه والعافية .. تقبل الله طاعاتكم انشالله

قرب شهر الخير والمغفره عسى الله يهدينا ويغفر لنا ويرحمنا ويعتق رقابنا من النار ..

- سبحانك اللهم اغفرلي اني كنت من الظالمين .

- اللهم اهدنا واهدي بنا .. سبحانك لا إله إلا انت إنك انت العزيز الغفار

- الحمدلله عدد خلقه و رضا نفسه و زنة عرشه و مداد كلماته

- رب أنى ظلمت نفسى فاغفر لى,انه لا يغفر الذنوب الا انت.

- -اللهم آتنا فى الدنيا حسنة و فى الاخرة حسنة و قنا عذاب النار.

- ربنا تقبل منا صلاتنا و قيامنا و ركوعنا و سجودنا و دعاءنا و صالح اعمالنا و اجزنا عنه خير الجزاء , اللهم اجزنا جزاء الصابرين المحسنين.

- اللهم باعد بينى و بين خطاياى كما باعدت بين المشرق و المغرب , اللهم نقنى من خطاياى كما ينقى الثوب الأبيض من الدنس , اللهم أغسلنى من خطاياى بالماء و الثلج و البرد.

- اللهم ارزقنا لذة النظر إلى وجهك الكريم .

- " رب اجعلني مقيم الصلاة ومن ذريتي ربنا وتقبل دعاء "

- " ربنا اغفر لي ولوالدي وللمؤمنين يوم يقوم الحساب "

** اهم شي الدعاء كثورا منه ادعوا حق الناس عسى الله يهديهم الدعاء والاستغفار شي مهم مو بس برمضان الله يعينه ويعينكم على

الطاعات يارب ..

- الله يعينكم يالمدخنين عز الله انكم ما اتحاجون اول اسبوع بالدوام

- اللي عندها طبخات يديه و فناتق يالله بس رجاءاً بعد الفطور

- يا جماعه ترى الفيمتو مو زين كله اصباغ و ايييب الحارج بدلوه بماي او اي شي ثاني وايد احسن .

** وعسى يتقبل منا ومنكم صالح الأعمال **

حده مو شي

** ساعات تصيير مواقف حدها مليقه و مالها داعي حق التوهق بس اذكر مره اول كورس لي بالجامعه وقتها كان فرايدايز توه

فاتح و حده لويه تواعدت انا مع وحده رفيجتي ان نروح نتغدى امي وايد صعبه و حجره فماتحب الطلعات و المطاعم والتزرق

بدون علمها فميمة النزقه تواعدت مع البنت و رحنا رديت البييت جان تقولي امي وين كنتي @@ انا انصدمت قتلها هاا بالجامعه

جان تقول والله تجذبييين بعد ليش طالعه بدون ماتقوليلي ؟ يعني اللي يسمع اقول انها اذا درت راح ترضى :(

شوفوا التسلط شلون اذا الله بيكشف الواحد .. ام رفيجتي اللي كنت رايحه معاها متصله على امي مادري شتبي فيها و من عرض

السوالف قالتلها انا رايحيين المطعم ، طبعا لي شهر جدام و انا مالي وي اشوف امي و حسيييت ان كلش ما تسوى علي هالطلعه ...


** واحد توه متزوج و طالع مع مرته معشيها بره ولا الطاوله اللي يمهم وحده كان يعرفها أول @@ كلش مو شي

** وحده تزوجت واحد اكتشفت ان صديق زوجها كانت تعرفه قبل الزواج .. يا لاهوييييييييييييييييييييييييييييييييييييييييييييي

** بنات مزرقين من الدوام رايحيين يتريقون بره اول ما دشوا ولا مديرهم قاعد مرتز داخل ...

** واحد سوى آدد حق وحده و سوالف معاها بالمسنجر آخر شي ولا مرته دازتها

** وحده تحاجي اختها بالتلفون و حش بالحموله و بخالتها ليين قالت ياكافي عقب ما سكرته ولا ريلها واقف وراها :) كلش ما تترقع

** وحده واقفه تطق كرت رفيجتها بالدوام بمرت مديرتهم و عطتها خووووش خزه و الخافي أعظم

** وحده بدز حق ريلها مسج شوي خاص يعني فيه شوي نينينينينينينينين قمت دزته حق عم ريلها -_- تقفه لا تقراه

** وحده توها متزوجه طالعه اهي و ريلها مع اخوها و يقعد الأخو ما خله شي من الماضي السعيييد ما قاله طبعا البنت ويهها ما يحتاي

** وحده توها متزوجه و حمولتها زايرينهم تحت و حدها مالها خلق دازه مسج حق اختها تقولها " مالي خلق انزل بسوي نفسي نايمه "

اكتشفت انها دازتا حق ريلها !! اشكره مالج خلق اهليييي


** وايد مليق الموقف اذا انحطينا فيه بهالصوره بس بعد فتره يصير سوالف حلوه الواحد يضحك اذا تذكرها ، طبعا اللي انكتب كله احداث حقيقية صارت لأفراد عايشيييين بييينا و انتوا قولولنا بعد شصار معاكم ...