الأحد، 27 سبتمبر 2009

I L TETTO

** مساء الخير شلونكم و شخباركم ...

- طبعاً انتوا تعودتوا علي بس احن و اتحلطم بس اليوم السالفة غير ..

رحنا انا و ريلي و بنوتي حق مطعم ايطالي يديد توه فاتح في مارينا ويفز .. اهو صغير و لما دشينا و ماكان فيه إلا احنه

مادري ليش كل ما اروح مع ريلي مطعم اوديني مكان ما فيه ناس :(

المهم دشينا ماكو احد المطعم صغير جم طاولة بس المطعم ايطالي بس اللي يطبخون كلهم هنود و مادري شلون صايرين المهم حسينا

انه الطعم طلع مألب و طاح بجبدنه طلبنا مقبلات و مين دش " اهم شي اللغة " و بنتي تحن صكت راس الويترز مساكين ماندري شفيها

المقبلات كانت : جكن ونقز " حقي طبعا انه اموت عليه " و مكس سي فود " حق الوحش الكاسر اللي معاي " و المين دش كان رفيولي

ماشروم و دياي و وايت صوص " اتعب عاللغة " صراحة الأكل كان مو صج حدة لذيذ و خصوصا الونقز عليه صلصة تينن و حتى السي

فود وايد ستانس علية ريلي المكان يبيله يمعه يعني اللي يروحون من 5 و طالع او بنات ياخذون راحتهم ايه نسيت شي كانوا حاطين رمكس

مو صج الأغاني حده كووووووول سكوووووول ...

بس الحلو ماجربناه طلبت كريب بالكاكاو بس قالي ماكو مو طابخينه اليوم " اللي يدل مكان يبيعون فيه الكريب بالكاكاو قولولي "

يالله بالعافيه اللي بيروحون انشالله يعجبكم ادعولي مو تدعون علي :)

هناك 27 تعليقًا:

نمووول يقول...

بالعافية عليكم

اي هنود يعجبونج ترى ..

ان شاء الله اجربة

زين عندهم برياني << تقولين ايطالي هاا ؟

غير معرف يقول...

بألف عافيه عليج
انت وعايلتج الله يحفظكم ويخليكم لبعض



ومساءج رافيولي :)


حبي

chandal/danchal!! يقول...

بالعافية

:)

المطعم بيصك السنة من فتح وانتي تقولين يديد!

;p

رحتله مرة وما عدتها... طريج السالمية مته واتثيقل روحة المارينا

كانت امسية مع صديقاتي وكانت جدا ناجحة بس الحلو ما توفقنا فيه... ومسكين ما قصر يابلنا حلو ثاني وما حسب علينا اللي كان مقلب... ويوم شفت السالفة جذي... هلقت بالقعدة وقلتله دام السالفة جذي(تن)... الأكل كله كان مقلب

;p

princess adadi يقول...

جان قلتي لنا شنو اسم المظعم :/

بالعافية مؤخرا ^^

فاطمــه يقول...

خوش طلعه ماشالله :)

اهم شي غيرتوا جو **
عاد أنا أموت على الأيطالي أكيد
بروح وبجرب وبقولج شصاااار

***

Seldompen يقول...

:)

عليكم بستين ألف عافية ..

وأهم شيء أستانستوا , وكان الأكل لذيذ ..


بوساتي لبنوتك

:)

تحياتي لك

bokeh of magic * يقول...

نطري بعد يومين على ما شبابنا يطيحون عليه بعدين ما تقدرين تدخلينله
اهم شي لما قلتي "مين دش " انا قريتها باللبناني عبالي قصدج منو دش؟
و لي اخر البوست اقول شنو منو دش ما قالت منو اللي دش المطعم كاااك مشالله علي P:
يالله انشالله نجرربه و نشوووف ذوقج بالاكل ^^

Fishah يقول...

بالعافيه عليكم

احلى مطعم فاضي شتبين بالزحمه عشان تاخذين راحتج بالاكل :>

ياحلوووها بنوووتج عيل صارت مزعجه ها ؟ اسم الله عليها :)

انزين جان حطيتي لنا مع هالتقرير الحلووو صور :>

الكريب استغفرالله مااااحبه :<
ما ذقتي اللي في جمعيتكم؟ ;)

اسألج وين يضبطونه اكثر شي .. وبالعافيه مره ثانيه :)

شاي الضحى يقول...

بالعافيه :)

في ناس امدحوه وفي ناس قالوا مو حلو

بس ولا مره جربته :)

ميمة السبيت يقول...

* نمووووول :

- البرياني انا هبيت فيه قبل فتره نبي اسويلك بس ما اتحمل العواقب :(

نورتنا يالغالي


** سلة ميوه :

- اللي يعافيج و يخليج يالغالية ماقصرتي ولهت على كلماتج و قصصج الحلوه ، لايطوفج والله كان مو صج الرفيولي :)


** جندل و دنجل :

- الله يعافيج يالغالية والله اهم كاتبين بالجريدة مطعم ايطالي يديد ، اشوه ما طلبنا حلو جان خرب الجو علينا بس اذا صارت مرة ثانية بسوي خطتج باكله كله تالي بقوله ويع موحلو :)


** برنسس حبوبة شلونج اسم المطعم اهو عنوان البوست :) الظاهر فييج النوم


** فيث :

- حياج الله يالغالية والله لذيذ الايطالي حسافة سكرو بومادورو دشيتله مرة وحدة جان يسكرونة ، تهقين قبست عليه ... ؟؟؟



** pen seldon :

- الله يسلمج مشكورة يالغالية ايه والله غيرنا جو انا صارلي شهرين خايفة اطلع من البيت اخاف اتخنزر :(

ميمة السبيت يقول...

** Bing One :

- لووووووووووووووووووووووول لأني كنت اكتب بسرعة و كلش مالي خلق اكتب انجليزي ..

عاد اهو صغير و الطاولات يم بعض و عيالنا كلش مايحبون التلصق ..

جربيه انشالله يعجبكم و اذا ما عجبكم دزيلي الفاتورة :)


** فشوووووشه :

- هلا و غلا هلا بالزين كله بنوتي كبرت عمرها 11 شهر تعرف تصفق و تغني رمضان مالت العفاسي تشرع حلجها لوووول

انتي شمقعدج لي هالحزة ما وراج دوام ؟؟؟

انا اجازة اسبوووع وناسة :)

اليوم عقب ماردينا رحت الجمعية انا خابرة في محل هناك اسوي رحت قالي تعالي بعد ربع ساعة لأنه كان يغسل المحل رديت البيت صليت و رديتله جان اقولي ماعندي كاكاو الله حفظة بغيت ابط راسة في بطل زيت الزيتون اللي شاريتة طبعا ياته زفة كره حياتة عقبها

ميمة السبيت يقول...

** شاي الضحى :

- صح الناس اذواق ، وانشالله يعجبكم


** فشوووووشة :

- نسيت اصور والله قميضة طافتني انشالله المرة الياية ، شفتي الإيميل مالي دزيتلج ميل قريتيه ؟؟

Angel Orchid يقول...

عليكم بالعافيه ...

انا اعشق الاكل الايطالي .. ودامج مدحتي الوينقز عيل يبيله روحه :)
الله يخليلج الفملييي :)

aL-NooR . يقول...

هني ..على قلبج :*
ما قط رحتله ..بس يبيله روحة ..
اهم شي وناسكم ..يا حلو لجتها بنتج احسها خفيفة طينة ..:**


تهقين يصلح فطور ؟
ومرة ثانية لا تبطين :*

jonoon 3aqel يقول...

بالعافية...

الله..ذكرتيني بآخر أحلى رحلة لمطعم..

كانت اختي عازمتني ف الليل...ماكان لي مزاج بس قلت حرام اكسر بخاطرها..و بعدين هي عازمتني..ف يعني..سببين خلوني اقبل ههههه
و الحمدلله كانت من احلى رحلاتي للمطاعم..
====

يا الله...عيدوا الكره..و اعزموا اشخاص من طرفك..و اشخاص من طرفه...و خلوا العزيمة تحلى بالجمعة

الله يهنيكم و يسعدكم

تحياتي

Fishah يقول...

ايييييييييييي قريته

حسيت ان انتي .. عرفتج من ال ** وانتي الوحيده اللي تناديني فشوشه :***

عاد والله جنج تدرين كنت ابي ايميلج .. ترا بخشه :>

اي المره اليايه بالتقرير الثاني نبي صور ان شاءالله :)

الزين يقول...

يا صباح الناس الحلوة

والمطعم قالوا لي عنه


ولي روحة اكيد

ووحشتيني

:*

ARTFUL يقول...

تبين كريب وناتولا

وحلو

عند

the crepe cafe

بالآفنيوز فيس تو يكون ورا لما تصعدين فوق يمينج ماكدونالدز ويسارج مطعم ستيك اسمه بوتشر

كملي سيدهيلف فيج الشارع يسار
p;

تلاقينه على اليمين

تبين الصج اهو مال رفيجي بس مهو تسويق صج حلو

بس الظاهر ما عليه دوس

:)

رورو الشخبوطه يقول...

السلام..

شلونج..

بالعافيه يارب..

يوديج مطعم فاضي لزوم الخصوصيه :)

ميمة السبيت يقول...

** angel Orchid :

- حبيبيتي والله الله يسلمج و يخليج حق اهلج و لاتشوفين صوووص الونقز وين وصل :(



** نور الدنيا :

- هلا والله شلونج ولهنا عليج .. يبيله يمعة بنات ويكون ماكو احد و نقعد عالبحر احلا شي بس حسافة مايمدحووون الحلوو عنده ، ماكو إلا نودي كاكاونا معانا

ميمة السبيت يقول...

** جنون عاقل :

- هلا والله بخويي الغالي الله يردك انشالله بالسلامة و تعزمها بمكان احسن انت بس شد حيلك ، لازم تنعاد عاد انا ماقصرت سويت انشر بالعايلة و الكل استانس بس عسى يعجبهم ولا شفكني من لسانهم :(



** الزين كله :

- اشووووف اليوم الدنيا منورة و الجوو روعة و الدنيا حلوة اثري الزين كله زايرتنا اليوم :****

ميمة السبيت يقول...

** artful :

_ حياك الله منور يالغالي و هذا موجود بجمعيتنا و قول حق صاحبك الله حفظ الهندي اللي هناك كنت ببط راسه على الدقه اللي سواها فيني :(

ميمة السبيت يقول...

** ام الفناتق :

- ايه والله ذبحني ماكو ناس إلا احنه لو رايحه ابجامتي احسن انقيهم نقوه الأماكن

lilly يقول...

أحلا شي تروحين مكان مافي ناس تاخذين راحتج .. شلج بالزحمه و اللويه

شوقتيني عالمطعم يبيله روحه انشالله :)

Butterfly Chick يقول...

bel3afya 3alaikum

yawa3teeni :P

ميمة السبيت يقول...

** Butter flay :

- عاد اتصدقين اليوم واحد معانه بالدوام كان رايح و مستانس منه خصوصا الحين الجو حلو و القعده بره بالليل عالبحر تكون روعه ، انا اللي ودي اروحله مره ثانية انشالله تروحين و يعجبج ..

حياج الله يالغالية لنستي و نورتي :)

كاتب الأنثى يقول...

مرحبا

هني وعافية والله يديم الفرحة في سماء الجميع

مع ارق التحايا
:
عبدالله