الثلاثاء، 10 نوفمبر 2009

للصبر آخر خلاااااااااااااااااااااااااااااااااص

** اكره شي عندي اللقافة و هالأيام في وحده عندنا بالدوام منتشر فيها هالمرض استغفر الله مادري شسالفتها غاثتنا عسى الواحد ما يتكلم إلا نطت و دشت عرض بأم السالفه ، والمشكلة سمعها مو طبيعي تسمع حتى الناس اللي بالمكتب الثاني ، تهقون محد قالها من قبل ان هذي الأشياء عيب الواحد يسويها و ان اللقافة طبع كلش مو حلو ؟ خصوصا ان احنا بالدوام والناس اللي معاج مو مجبورين انهم يتحملون ملاقتج و لقافتج

قبل جم يوم كنت اكلم ريلي بالتلفون و فجأه جان تنط و تقول " ميمة وااااااااااااااي ليش تكلمين الريال جذي @@ ؟ يمكن انا ظليت نص ساعة اتعوذ من ابليس لأن ان قمت لها ببطش فيها و تتدلع بعد جبح وي، صج صج صج لوعت جبدي وييييييييييييييييييييييع
منو منكم يعاني مثلي و قولولي شالحل ؟ لأن صج الكل بالدوام متضايق منها و صارت منبوذه من الكل

هناك 35 تعليقًا:

aL-NooR . يقول...

يا صبــاح العسارة و التحلطم ..يا حلوج حتى عسارتج غير نمومة :*

ويييييييه هالاشكال ترس الدنيا ..بس مالج الا توقفنيها عند حدها ..و يمكن انها تمادت من سكات اللي حواليها ..و اذا الباجي رضوا انها تدخل انتي وقفيها عند حدها ..قولي لها
" فلانه ترى اسمحيلي بس تجاوزتي حدودج معاي "

و كيفها ..


************************

الزين يقول...

يوديها وعطيها كلام يابس

ورسمي لها حدود وااضحه

وقولي لها ترى احنا محنا ملزومين فيج

اقصاج زميله

بيدج تكسبينا باحترامج لحدودنا وخصوصيتنا

ما تقدرين


حفظي كرامتج لأن هالمرة طافت

المره اليايه الكلام معاج بيكون غير

والله الحين
قومي سوي شغلج وحللي معاشج ابرك

:)


تبين انا ايي اقول لها هالكلام

عادي ترى ما عندي مشكله

ميمة السبيت يقول...

* نور الدنيا :

- والله ياخويتي عيزت ادقر بس ماكو فايده بس الظاهر بييها شي جايد بالطريج

ميمة السبيت يقول...

** زيووون :

- يمه انا اخترعت والله انج مو هينه تعالي يبه و الله انج بتاخذين فينا كلنا اجر

نمووول يقول...

الله لا يبلينا بامثالها
تصدقين مهما تسوين فيها
تدقرين تقطين نغزات عليها
م راح تتسوعب لان فيوزت العقل ضاربه
احسن حل انج تخرعينها ..

علي يوم اخذيها على جن وقوليلها
انا بذبح وحدة من الي معانا ؟
بعدها بتخاف وما تقرب يمج

بس خوفج تقولج يلا فوقه انا معاج ..

الله يعينكم
بالتوفيق

غير معرف يقول...

والله يايه اكتب مثل اللي قالته الزين!


عطيها حجوّه بالعظم
خليها تعرف قدرها
لا تعد نفسها رفيجة...
لأن الرفيجات مايتميلحون جذي! قطع..
ياربي ..تدرين اخيس شي
لما تكونين انتي حدج ذوق
ومحترمه
و مالج حس
واتييج وحده من هالنماين
شلون الواحد يتعامل...

وبيني وبينج انا ابي الزين تيني الدوام وتعطي جم وحده من اللي يحبه قلبها
لأني اوزع نصايح وانا بروحي ماطبق!
استحي احرج والا ادقر وحده
وعندي وحده...يانا دقرتها عيد....
بس وين ...الحيا والذوق ذابحيني بعيد عنكم




لاتستعسرين
احنا معاج:)



حبي

أحمد يقول...

و الله أنا رايي أنه تعطينها بالويه .. قوليلها الي بخاطرج ولا يهمج من ردة فعلها .. أفل شي انها بتحس بالي قاعده تسويه ..

تحياتي .. أحمد

رورو الشخبوطه يقول...

السلام..

مدام مكرره الحركه معاج اكثر من مره كلميها بزف خل تادب..

والله يعينج يارب..

شاي الضحى يقول...

الله يعينكم عليها


حقريها مره عن مره يمكن تفج عنج

jasem يقول...

السلام عليكم
أختي ميمة
هذي مو بس لقافه
هذا محاولة تدخل بين مره وريلها

نصيحه لااتكلمين ريلج جدامها
لانه متوقع اتقط الاذن وتراقب
فيه ناس أستغفر الله ماعندهم الا مراقبه الناس والتدخل فيما لايعنيهم

اذا عادتها بتدخل مشابه
اخذيها من قاصرها وقوليلها
من راقب الناس مات هما
وهالكلمة راح تكون طراق يمكن يصحيها
الله يحفضكم

jonoon 3aqel يقول...

الله يكون في عونكم..

انا اشوف ان تختارون أحد يصارحها..و يكلمها كلام مختصر بأسم الكل..لكن على انفراد طبعا..

" ليش تكلمين الريال جذي؟"
!!!!!!!!!!!!!!!!!!!!!!!!!!!!!!!!!!
الله يهداها..عاد في اشياء واضحة يعني ما يبي لها توضيح..

استغفر الله..أحس ان احنا نغتابها...

الله يصلحها..و يعينكم

دمتم بخير

تحياتي

chandal/danchal!! يقول...

الحقران احسن شي

معاي وحدة بالدوام ما بينا الا السلام

امس تقولي واهي شوي وتبجي " الله يهون عليييييييج :(((" ... مع طبطبة على البطن وانا طفارتي احد يجيس بطني... دكتور السونار ويالله... وتختم بتعليق وااااااي بطنج يابس"!!!

شرد عليها هذي!

خليتها تولي وما رديت ب ولا كلمة

احسن اشارة حق الملاقيف... الصمت وعدم التعقيب على اي ملاحظة!

Fishah يقول...

صباحوو

ميمه مادري شنو سالفة التعليق عندي .. حوسي فيه لما يطلع لج المؤشر ههههههههه

وهالزميله انا عانيت من وحده ملقوفه مثلها وكانت تدق علي اخر الدوام واحقرها وبعدين اكتشف انها يمي بالاشاره واهيا تدق علي وانا مارد عليها اشكره (صادوووه) ههههههههه

اخر شي انتقلت (الحمدالله) وافتكينا منها :>

بس ما واجهناها .. نتحاشاها وناخذها على قد عقلها :)

بس كلش كلش جعميها على غشمره .. اهون شي

:)

Sweet Revenge يقول...

والله ميمة مدام دقرتيها ومازالت مستمرة بسوالفها الماصخة مالها الا طريقة الزين
وصدقيني تري مسكينة شكلها والله اعلم حياتها فاضية ومتفرغه لكم.

ميمة السبيت يقول...

** نموول :

- والله شوف اهي تحب القهوة شكلي بحطلها باجر سم الفيران و افتك منها

ميمة السبيت يقول...

* سله :

- والله شوفي انا متبعة اسلوب مو بس حقران يعني قامت تيي تسولف ولاأرد عليها ولا حتى اطالعها بس للأسف ماكو فايده .

اليوم ياتها زفه عالخفيف انا طبعي ارد بنزر و شويه ناشفه فياها اليوم شي خفيف و أعتقد انها ماراح تفكر تدش مكتبي بعد وبصراحة اتمنى هالشي

ميمة السبيت يقول...

أحمد :

- الله يعينه ياخوي انا ما احب اضايق أحد او احد يكون زعلان مني بس ساعات خلاص الواحد مايتحكم بأعصابه

ميمة السبيت يقول...

* ام الفناتق :

- ايه والله الله يعينه عليها .


** شاي الضحى :

- شنسوي ياخويتي انا اقول انها ابتلاء من الله عاد انا دم ضروسي هالشي اللقافة ويييع

ميمة السبيت يقول...

* جاسم :

- ياخوي وين اروح مكاتبنا كلها مفتحه ماكو خصوصية كلش مو كل وقت اذا ياني تلفون اقدر اقوم اطلع بره و اتكلم لأن يكون عندي شغل بس اللقافة و قطة والويه يعني لي متى

ميمة السبيت يقول...

* جنون عاقل :

- شفت شلون بس ماعليك ياها شي اليوم ما كانت تتخيله عاد انا لا افصل على احد بس والله تستاهل


** جندل :

- وااي الله يعينج عاد الحامل يسألونها أسإله عجيبه و غريبه انا ينينوني و عساج ماتقولين بولد برويال حياة إلا طلعوا فيه 60 علة واهو ينن صراحة .

انتي رفعي الجام و اذا حاجتج مرة ثانية غسليها مثل ما سويت انا اليوم

Romia Fahed يقول...

عساج بخير ميمة ..

تدرين ما أعرف أزف أحد ، أشعر بالإحراج وكلّه أقول حرام وألقى لهم
عذر بين طبيعتهم جذي أو مرض نفسي

الملاقيف يكسرون الخاطر مثل ما يكسرون
أعصابنا ...

اممم.. في موقفج هذا ..على حسب
شخصيتها بأشغلها .. بما إنها
ملقوفة ..أعطيها سالفه أو أدزها
على أحد تقزر اليوم عليه :p

دمتِ لمن تحبين..

روميه

ميمة السبيت يقول...

* ابييه صارت لي هالسلافة بس اشوه كان عندي خط ثاني فرقعت السالفة لووول

انتي شلونج و فشوووش بسج قز :)

ميمة السبيت يقول...

** سويت رفنج :

- والله ياخويتي عيزنه و احنا اندقر بس اعتقد انا خلاص عقب اليوم راح تتوب حدها السلام و المشكلة انا بسرعة يبين على ويهي يعني اذا انغثيت من احد خلاص يبين علي انه لايعه جبدي

غير معرف يقول...

والله يا ميمة جنب الغيمة ونجوم المعليقة ، اللقافه شي مقدس عندنا بالكويت وخصوصا الجيران وايد ملاقيف ويدخلون خصهم بشي ما يخصهم ،وانتي مشكلتج انج معطتها ويهي شكلج وكانت صديقتج الصدوق من قبل وكنت تفضفضين لها من قبل فعيب عليج تقلبين عليها هالقلبة،مو زين ترا ويا ريت تتكلمين عن الصداقة واشلون الواحد يكون صدقات ويخسر صدقات واشكثر عندج رفيجات يا ترا يا هل ترا؟؟؟؟

ميمة السبيت يقول...

** غير معرف :

- عيب علي ؟؟

اهي مو صديقتي و علاقتي معاها عادية سلام و سوالف دوام بس اذا الواحد تدخل بشئون غيره بطريقه زايده عن اللزوم أعتقد هذا العيب و انا ما شهرت فيها و لا قلت اسمها و لا شي عنها وين العيب بالموضوع

secret يقول...

هذي مسكينة عقلها قاصر و ما تدري ان اللي تسويه عيب

و الله من طيبج و السنع اللي فيج اللي متحملتها

:))

بس اذا لقيتي حل لا تبخلين علي و انا اخوج .. الحال من بعضووو

:)

ميمة السبيت يقول...

** رومية :

- حياج الله يالغالية من زمان عنج نورتينا و انا بخصوص صاحبتنا خلاص سلمت امره للرحمن لأن شكلها مطوله السالفة

ميمة السبيت يقول...

* سيكرت :

- الله يعينا يا خوي مير بعض الناس سوالفهم ما تترقع كلش

Hope يقول...

واااااااي ماحب اللي جذي
ناس فيهم مرض اعوذ بالله منهم

ماكو الا انج تاخذينا على جنب و تقولين لها ان مو عاجبتج تصرفاتها
قوليلها ان ما تتدخل بخصوصياتج

من صجي لا تستحين ولا تخافين تجرحين مشاعرها
لازم توقفينها عند حدها ولا راح تتمادى و تلوع جبدج بلقافتها كل يوم

Good Luck و الله يعينج

Ahmed Al-Salami يقول...

السلام عليكم..
اسمحي لي (ادش عرض) على الموضوع واشارك بوجهة نظري الشخصية، بس مو مثل رفيجتج اللي بالدوام عسى الله يخليها لج :)

اللقافة طبع يتطبع فيه الانسان من واقع المحيط الاسري اللي عايش فيه، يعني تلقين في بيتهم أو بيت اهلهم اثنين ولا ثلاثه ولا العايله باكملها ملاقيف، يقطون اذنهم ويدخلون عصهم بالشي اللي ما يخصهم بس المهم يتليقفون.. عندنا وعندج خير.. معاي زميل نفس حال زميلتج ويمكن اخس.. يحب يقط اذنه ويسأل في كل شي.. (منو هذا.. عن شنو اتحجون.. ليش وشحقه.. وشكو ووو) إلى أن واجهته بمره من المرات وقلت له يا اخي استح على وجهك قاط اذنك ومدخل عصك بشي ما يخصك.. ما يصير اللقافة مو زينه.. تعدل لمدة يومين ورجعت حليمه لعاتها القديمه.. :)

بنت الشاميه يقول...

امي الله يحفظها دايما تقول
الحقران يقطع المصران
هذى ما يبلها الا الحقران
وتقلب العيون..... ولا تردين عليها
واذا ما فهمت الرساله

ماكو الا الشعام و مباشر بالويه
لا تتردين هالنماين ما تستحى
عطيها بالعظم
والله يكون بعونج

ميمة السبيت يقول...

* hope :

- من اللي يحب جذي يعني انا ناتخيلت لقافتها توصل لمكالمتي انا و ريلي والله لو وحده ثانية جان غسلتها عدل بس الواحد مايبي يسوي عدوات بالدوام احنه نقعد فيه اكثر من بيوتنا شتحطين لها و تطييب هذي ؟

ميمة السبيت يقول...

** أحمد السلامي :

- ليش يخليها لي حرام عليك :(

والله يشوف يخوي هالنماين لازم تتهاوش معاهم و تقطع علاقتك فيهم بالمره يمكن تفتك والمشكلة صار وضعها يكسر الخاطر لأن العموم كارهها فصارت منبوذه بالإدارة و اهي كبيرة يعني مو طقتنا فالكل مستحي يكلمها يمكن انتوا الشباب عادي بس احنه تستصعبها شوي


حياك الله نورتنا و مشكور عالمرور و الشاركة :)

ميمة السبيت يقول...

** بنت الشامية :

- اخ يا قلبي اي حقران خليها على الله انا قمت امر على مكتبها حتى ما اطالعها من كثر مو لايعه جبدي واهي تدري ان في شي بس ماكو فايده والله غاثتنا

lil.D يقول...

بس تخيلي؟ مجرد خيااال ،،، يوم يكون هالطبع في ريال؟ قمه اللقافه وقلت الادب !! مب فالحياه الشخصيه؟ لا فالدوام ،،، تتكلمين مع مديرج ولا مع حد من الموظفين في شي و ينط بالنص ع قوله المصريين (مثل الاضى المستعجل) ويبدي رايه !! ويسوي عمره ابوو العرييف!!! وفي كل صغيره وكبيره لازم يضع لمساته!! وعقب يسوي مشاكل مع الكل لانه يتخشش كل مكان وينقل الرمسات!! واخر شي يحط على راسه طوق الملااااك وعباله ماحد منتبه للي يسويه!!!

انتي يوم تقولين عن بنت!! بصدق وبقول فالنهايه بنت وملقوفه!! بس يوم يكون ريال بالله شووو تقولين؟ لووول


الله يكفينا شر اللقافه