الجمعة، 28 مايو 2010

سوالف

* اهلا اهلا شلونكم و شخباركم اليوم اليمعة انشالله ترد اليوم امي ذبحتنا اهي صج مسكينه صارلها بس اسبوع مسافرة بس تعودت







اني اروح بيتنا وايد حتى جوجو مسكينه تمشي و تنادي امي تكسر الخاطر انا مورايحة لبنان موشايفتها خواتي و امي لما راحوا ماعجبتهم يقولون مكسرة و قديمة ( ايه ليش رايحين من الأساس ) بس يبقى الأهم بالموضوع إنا ننطر الصوايغ هيهييي











** صديقتي الصدوق عازمتني على عرس بنت اختها انشالله بعد اسبوعين و هالأيام مادري شيايلي عالأكل يانه و قاعدة فأمس بما انه ماكو شي مفيد اسويه قلت اروح امشي عشان يمكن و انشالله و اتمنى انها تصك البدلة .. الحاصل قمت شحلاتي لبست القميص المعهود مال المشي و بنطلون بو الشباب و طلعت .. من اول لما كنت امشي كنت امر على ريال شايب يقعد برة عالكراسي جدام بيتهم فامس و انا امشي مريت يم بيتهم و بعد واطفت ولا اسمع واحد يقولي السلام وينج من زمان ما مريتي !!!!



وقفت سلمت عليه و مشيت كسر خاطري احس محد يدري عنه و قلت بقلبي و الله انك ياعمي و لو انك ماتعرفني و لا اعرفك احسن من وايد صخول و خصوصا بالدوام نمر و نسلم و مايردون و لا يسلون حتى ما اقول إلا مالت من زينج عاد سلمتي ولا عند يدي اللي راح و ما رد







و بطريق الردة و انا حدي طايح حظي و انا امشي و إذا بشي يناقز جدامي و لا ذاك الجلب انا صبت عظامي لاني قادرة اكمل و لا قادرة ارد و البيت قريب بس موقادرة اوصل ااشر حق الهندي التبن موراضي يستوعب و اوقف يمكن 10 دقايق و لساني واصل لي ريلي من العطش نطرته لين راح مادري وين راح و كملت .. يعني لما تحطون جلاب ببيتكم لاتهدونهم ترى في ناس تخاف حتى لو كان صغير حسوا فينا شوي .... ترى صج نخاف









*** احتفالا بعودة امي حطينا انا و جوجو حنه عشان لما ترد تشوفنا حلوين و ريحتنا حلوة و طبعا محد احط حنه هالأيام إلا انا و جوجو و فضه مرت شاهين الله يرحمها






( رجاءاً لحد يعلق على الزولية انا حاطتهم جذي لأسباب أمنية لحماية جوجو )

**** لليحب هالو كتي في ستاند بالخالدية فوق يم البودي شوب كله اشياء هاللو كتي وايد حلوة حق اللي عندها بنات ..





**** ابي حضانة زينة حق جوجو بس سعرها معقول حضانة بألف و نص ليش .. افيدونا لو سمحتوا





- ليش السيايير صايرين نار ابيييه غالين بشكل مو صج منو منكم مجرب جيبات الفورد ؟

هناك 33 تعليقًا:

رورو الشخبوطه يقول...

ترد بالسلامه يارب..

وتزفيني لي كليت خخخ ..

سوي سيرج بقوقل بنحصلين مواضيع عن الحضانات واسعارها..

او يبيها عندي انا اجابلها واعلمها ع الاكل والصالونات خخخ..

اي ع طاري الفورد اخوي سيارته اتوقع هالحزه نايم بس خبري فيها وايد تصرف بانزين ..

ومرسو..

ميمة السبيت يقول...

** ام الفناتق :

- لايمعودة باجر تنهبنا بهالكريمات و الخرابيط و المطاعم

و اكلي افا عليج بالعافية قوليلي وين بيتكم عشان اييبلج حلو لبناني فرش من الفرن إلى معدتك

ها وين الطلعة اليوم ترى اذا طلعتوا من ورانا انتي و ام الفيل ادز عليكم الجلب الودر اللي طلعلي ديري بالج

شاي الضحى يقول...

جنه في احد حش فيني؟!!!

ان شاءالله امج ترد بالسلامه

ذكرتيني بشياب الممشى كنت اقول وناسه الممشى كله شياب ما يتحرشون بعد اسبوع اكتشفت انهم اخس من الشباب وكلهم قاموا يتحرشون وواحد يقولي ترا انا كنت اشوفج من الصيف واذا تميت جم يوم ما رحت يقولي الثاني وينج من زمان ما ييتي؟! ويييع كرهت الممشى منهم لا ويلحقون بعد

ما احب الحنه ولا احب ريحتها بس مو انتوا الوحيدين الي تحطونها كل ما اروح الصالون ما شاءالله متروس بنات من عمري واصغر يحطون حنه ورفيجاتي بعد يحطون

وبالنسبة للحضانه ماعندي خبره بالموضوع

بس بما اني بطاليه ييبيها عندي واسويلج خصم بالكورس الواحد 200 دينار هههههههه :q

ميمة السبيت يقول...

** شاي الضحى :

- لا مسكين هذا محرول صيف شتا غبار رطوبة كله امقعدينه برة فقير

شوفي اييبلج جوجو بس لازم تعلمينها لغات مو تشري و خساير مثل ام الفناتق ررورروو بس قاعدة و تتصبغ و انشالله نشوف عيالكم و نفرح فيكم و فيهم

AlMai Port l ميناء الميّ يقول...

بالسلامة :)
فورد ايدج يندحونه, ووايد أعرف عندهم ومرتاحينله.

chandal/danchal!! يقول...

يوصلون بالسلامة

:)


يا كره الممشى... حاشاج الجلاب صايرين هبه والمشكلة كل يطحسون مع الصبي

ويا حلو اللي يحطون الحنة... بنتي عندها فوبيا من الحنة... عيزت اساحل فيها بس ماكو فايدة ما ترضى تحط شي وشعرها مشوهب يلوع الجبد!


حضانة هابي لاند اللي بالفيحا وايد زينة


بصراحة الحضانة لازم تكون وايد نظيفة والمسؤولين فيها على درجة عالية من النظافة والثقة... لأن الياهل بهالفترة بسرعة يتعادى وحضانات نص كم ما انصح فيها... يا تخلينها بالبيت معززة مكرمة مع وحدة تأمنينها عليها واذا لج خلق وديها عند امج بطريجج للدوام... واذا ما ينفع وديها حضانة سنعة وما تغلى عليها الرسوم... ما عندنا اغلى منهم الله يحفظهم

BookMark يقول...

مساء الخير

ضحكتني صورة جوجو تذكرت واحنا صغار يربطون روسنا وايادينا ابسبة هالحنة :)

ودي أحط حنة بس مافي وقت :/

والحضانة .. على حسب منطقتكم يعني قوليلنا وين ساكنة ونقولج عن الحضانات المناسبة ;)
(مو لقافة صح)

ميمة السبيت يقول...

** mai :

- الله يسلمج يالغالية .. ادج حلو بس انا ابي اقل تكلفة يعني بحدود 7000 و أقل

مشكورة عالمرور

ميمة السبيت يقول...

** جندل :

- الله يسلمج شفيج جنه المزاج اليوم مش ولا بد عسى ماشر

الحنه لازم تعلمينها عليها من البداية انا احط معاها و متعمدة احطلها من الحين عشان ما تكرهها

ميمة السبيت يقول...

** بوكمارك :

- حياج الله انا بيتي بالزهرا و الحضانات فيها اكثر من البيوت بس ابي مكان ثقة و تستفيد منه بتني

chandal/danchal!! يقول...

سلامت عمرج ما فيني شي... ما ننحرم من السؤال

:)

عن تجربتين اكتشفت ان الحضانة احسن مكان اخلي فيه اليهال اثناء تواجدنا بالعمل... ولا الطحسة مع الخدم مهما كانوا حليوين... فمن جذي تلاقيني وايد احرص على سالفة الحضانة


وان شاءالله تتوفقين بحضانة تريحج وتريح جوجو

:)

اتمسي بالخير

:*

سلة ميوّة يقول...

ربي يوصلهم بالسلامة وتقر عيونج



وياازييييين البنااااات يالبيييييي يالبيييي...

الله يحفظها ويبلغج فيها يارب:*

ميمة السبيت يقول...

** جندل :

- صباح التوت و العوليييييييييء انشالله بجيك على الحضانة اللي بالفيحه و تييج الاخبار انشالله

- على هامش الهامش

اهداء اغنية شمس بيني و بينك هذا واحد يغني اسمه اصيل بعد جيل سيد درويش على طوووول

ميمة السبيت يقول...

** سلة ميوة :

- الله يسلمج الحمدالله ردوا و لاتشوفين جوجو مسكينه مومصدقه ماتدري شتسوي صج فقدتهم حبيبيتي طبعا نامت عند امي يعني امس كان الأوف مالي لووول
الحين عاد ننطر الغنايم

شيء ما يقول...

فديتها ام الحنة تونس ^^

حمدلله على سلامتها

على الزولية انا مقدرة حبيبتي اليهال يبيلهم حماية اكثر ^^

Flowera يقول...

esmella 3laiha jojo etshaweeq
Allah ykhaleha lekum yarab

el7imdella 3la salamat elwalda =)

@alhaidar يقول...

يرجعون بالسلامة انشالله .. والله يخلي لكم جوجو :)

اللي أقدر أفتي فيه طبعا موضوع السيارات ..

مادري شخصيا ما أحب الفورد .. ولا السيارات الأمريكية عامة ..

تبين نصيحة أخوج خلج على الألماني أو الياباني .. ثقة أكثر ..

تحياتي .. وتقديري :)

Made n Q8 يقول...

الله يردها لكم بالسلامه

ويا حلوها جوجو متحنيه اسم الله عليها

وشوفي حضانه اسرار القبندي الي بالدسمه

ARTFUL يقول...

حنننه يا ظالمه


اله يحفظها ويسلمها يا رب


حنيتي اديّاتها؟؟

D;

جم عمر جوجو؟

:)

ميمة السبيت يقول...

** شيء ما :

- هلا والله حياج الله والله عافستنا هالجوجو من مشت و احنه بلوية و خبرج الحين كله سيراميك فإتني رقعي شوية لين تكبر

مشكورة عالمرور و حياج الله

ميمة السبيت يقول...

* فلورا :

- الله يسلمج شفتي بنتي دقمة و اهم شي تصفط القعدة شي جوجو

ردت امي الحمدالله مشكورة

ميمة السبيت يقول...

** أحمد الحيدر :

- اهلا اهلا من طول الغيبات عاش من شافك

والله ياخويي مابقت وكالة مارحنا لاعت جبدي الفورد يقولون موشي كلش يطق القير مادري شنو يعني بس الوكاد انه شي جايد

شكلنا اخر شي كورولا

ميمة السبيت يقول...

* ميد ان كويت :

- الله يسلمج و يخليج ايه حنيتها لاتشوفينها شسوت لما سبحتها بس لازم تتعلم عالحنه ماكو فكة

والدسمة بعيدة علي انا بالزهرة درب

ميمة السبيت يقول...

** آرتفل :

- طبعاً حنه فور إفر ماكو رووح و تعال لا بس شعرها كافي صار حمللر شحلاته

جوجو الحين سنه 7 شهور بس دقمه مادري من عليه طالعة :)

V I E W يقول...

كسر خاطري الشايب شكله امسيكين :(

مااااحب الحنه مادري شلون كنت احني ايدي
وانا صغيره :|

يختييي هالجووجوو الله يحفظها ويخليها لج ..

والله انا سامعه ان في خوش حضانات صوبكم
بس نسيييت الاسم بس انشالله تحصلين حضانة زينه

الزين يقول...

u have a home work in my blog

check it out plz

ميمة السبيت يقول...

** شيخه البنات :

- انشالله و الغنيمة

ميمة السبيت يقول...

** sweetheart :


- اي والله فقير محرول يكسر الخاطر

جوجو فلم بروحها هالدقمة

aL-NooR . يقول...

يا حلوج و يا حلو سوالفج :*

احلى شي الناطعة اللي معطيتنا ظهرها بالحنة
مع اني مو من ربعها ..بس عوديها ترى مفيدة والله ...و عسى الله لا يخليج من الوالدة :**
الا شنو كانت الصوايغ p;


و يا حلو الشساب استاااانس على سوالفهم ... بس مو الشياب الدعل ..ما اتحملهم ابد ..

يممممممممه ..اموت لا يمر يمي تكرمين جلب
:( ..لا تشوفيني برة الكويت اناقز ..جني كنغر يكيفيني الشر p;
بس تصدقين صايرة هبة ..تكرمين جلاب بالكويت ... عبالهم شي حلو ..

*****************************

ARTFUL يقول...

عندج واجب


http://artful-artful.blogspot.com/2010/05/artful-royal-crown.html

ميمة السبيت يقول...

** نور الدنيا :

- ماشفتيها شسوت يوم سبحتها هاهاها طلعتلي قروون الحنه تينن و وايد زينه حق الراس

يله تزهبي المرة الياية اسويلج حنه معاي و نصف انا و انتي و جوجو

ميمة السبيت يقول...

** آرتفل :

- انشالله عمي

غير معرف يقول...

Thought I would comment and say neat theme, did you make it for yourself? It's really awesome!