** أهلا أهلا شلونكم ادري فاقديني من غير شر بس مادري شفيني قريحتي البلوقية حايشها جفاف .. المهم في جم شغله حبيت اقولها
*** امس معزومة على عرس مع اني اكره روحت العروس بس ساعات يكون لازم ان نوجب الناس بس صارت جم شغله لفتت نظري
أولا : ليش المعازيم اليهال أكثر من الكبار ؟؟
ثانيا: ليش فطاير محيسن يدورون فيهم مع الجاي بعد دشت العروس انا خابرة ينزل حلو القهوة جان هذي هبه يديدة والله مادري ؟؟
ثالثا : كلش ماله داعي بنت اخت العروس تسوي وقوف عالراس بالكوشة و العروس توها داشه
رابعا: ليش أغاني ساجدة عبيد بالعروس ترى عيب اذا تحبونها حطوها بيمعتكم و رقصوا عليها بروحكم
خامسا: البنات المومتزوجات ماله داعي ترقصون على كل اغنية بالعرس يعني شوفوني عفيه حيل ماتعيزوووون ؟
سادسا : عمرج 60 سنه حدج ترقصين على يا شايل الظبي ولا ياسعود رجاءا رجاءا مو سواح و تسوين حركات حسبالج دينا
سابعا: لاتتزوجون من الأهل ترى والله يسبب الأمراض و في بعض الحالات يسبب عقم
ثامنا : بعرس الرياييل كلش ماله داعي تقولون حق ريلي الفال لك هذي نغزة ولا شنو ؟
==========================
** طبعا احنه زوارتنا عند امي يوم الثلاثه فحبيت اسوي كيكة يعني مو بس جاي الضحى كل يوم حاطه شي و طايحتله طبخ فحبيت انافسها
قمت و سويت الكيكة الحلوة هذي بس ماراح اقولكم منو كلاها انتوا راح تعرفون بروحكم و اللي يبي المقادير اسفه ما اعلم
==========================
اذا احد طلب مساعدتكم عن التفلسف الزايد و تسووون نفسكم بتصلحون الكون ترى ما يالكم إلا ان انه صج محتاج احد يكون معاه
هناك 43 تعليقًا:
انت ليش معصبه
:)
خلي العالم تفرح
وخلي الناس تهلق على كيفها
ترى اهم ما يشوفنهاهلاقه
وكلن بشغله راضي
تعالي قولي لي
شنو نكهة الكيكه
:*
ولكم باك..
امس كان عندنا عرس بس مارحت له خل اسال اختي ليكون نفس العرس :p
ويع اكره شي يخطبونج لانه شايفينج بعرس :\
واللي يقول ريلج الفال لك المفروض يجعمه ..
وبالعافيه الكيكه ..
ومرسي..
هاهاهاهاهي
من طول الغيبات جاب الغنايم
وتكفين لاتقولين شصار على غنايم :)
ادري فيج:P
المهم
والله على طاري العروس...
تدرين اليهال أحباب الله
إلا بالعروس...
يصيرون نقمة..:)
ولا لما يونج لابسين نفنوف اثقل منهم
وقاعدين جنم بوذا مهم قادرين يسون شي غير التفرفر وتسحب نفانيف هالامهات..واي:) مالومج
المهم..
الكيكة شكلها حلو..
ولاتخافين انا اشطر وحده ( ما ) تسأل بالمقادير...
إن بغيتها بطلبها من صاحبة الشان رأسا:)
وصراحة...اللي قال القال لك
حق ريلج...
ماعنده نظر..وسفيه...ياشين الرياييل لي تميلحو..
مساج الله بالخير:*
ثالثا : كلش ماله داعي بنت اخت العروس تسوي وقوف عالراس بالكوشة و العروس توها داشه
.......
شلون يعني .. ما استوعبت؟
سابعا: لاتتزوجون من الأهل ترى والله يسبب الأمراض و في بعض الحالات يسبب عقم
.......
تذكرت سالفة .. اثنين فحصو قبل لا يتزوجون ..طلع غير مطابق .. جان يفحصون بالخاص طلع مطابق .. شلون؟
الكيكة .. مو ضروري شكلها .. طعمها حلو .. صح؟
حطي مليون وستمية واثنعش خط تحت اغنية سوااااااااااااااااح
العلي والبنعلي يرقصون عليها
يختي عمرج ما يناسب ارتزي بمكانج
وزنج ما يساعف ماله داعي الناس تشوف الشحم يهتز
غثاااااااااااااا يختج مو عرس
والكلام نفسه عن الملابس
يعني ماله داعي تصيرين صباح بالعرس وتلبسين حالج حال حفيدتج الرابعه عشر
حلاة الواحد يعيش عمره بتصرفه ولبسه
وبس وبس
اذا قالوا له الفال لك
اقول آآآآآآآآآآمين وانت ويااااااااه وآنه اللي بخطب لك
وعنوان البوست شنو علاقته بالموضوع؟
LOOOOOOOOOOOOOL
ميييييييييييييمة يغربل ابليسج مت ضحك على بنت اخو العروس.. احس العروس ودها تشوتها وتطلعها برة الكواليس!
الله يهداهم على تسحب هاليهاهيل بالعروس... يقلبون العرس رأسا على عقب مثل ما سوت بنت اخت العروس
:))))
واشتطلع ساجدة مادري ايش؟... عليج اسامي مغنيين مادري من وين اتييبينهم!... وتقولين عني داثرة!
:p
اعرف وحدة عمرها سبعين ما ترقص الا على وحشتني عدد نجوووووم السما وحشتني... مضبطتها بكل العروس
الدهن بالعتايق انتي بس متعقدة من لياقتهم والشد العضلي اللي يحوشج على ادناة الدون
:p
اهو اكو كيك من الاساس؟ انا ما اشوف الا كريما!
نورتي الداش بورد
:))))
ما مروا علي المعازيم اليهال اكثر من الكبار اذا فيه يهال يكونون القراب حيل من العروس
فطاير؟ هههههه هم هذي يديده
بتوريكم مهاراتها لول
منو هذي ماجده عبيد؟!!!
خليهم يرقصون جود ينخطبون
هاااا جنه السالفه صارت منافسه !!! ههههههه
وااااضح منو كلاها ههههههه
شكلها عجييييييب
جربي سوي مره ثانيه واكيد بتكون احلى بوايد
شكرا :)
يمه يمه شفييج كليتينا لووول
بالعافيه الكيكه وتسلم اديينج وشكرا مانبي منج شي لوول
صج ولهنا عليج
ولكم :*
الحمد لله على السلامه اولا
ثانيا : واااي لعرووس مشكله لو شنو تحجينا ما انخلص بس اقولج شي عطيتيني خوش فكره حق موضوع ببلوقي عن العروس ..ان شاء الله اتشرفيني بزيارتج
ثالثا: الكيكه اتونس :)
** الزين كله :
- آه لاتذكريني ياخسارة تعبي و جهدي محد حتى ضاقها من الفرن إلى التراش كان للأسف محد يقدر المواهب الدفينه اللي فيني :(
- يختج هلاقه عن هلاقه تفرق في هلاقة تضر العين ماتقدرين تسكتين عنها شي ينرفز
** ام الفناتق :
- اي يجعمه إلا حده مستانس الضاهر يبي الشاره الحجي بس ماكو قاعدة على قلبة
ومرة ثانية اذا يتروحون انتي و شاي الضحى عزمونا يا النحيسين
** سله :
- مساء الورد على الورد ياختي الكيكه تفشل حاولت اخليهم اذوقون عالأقل محد رضى يغامر كله داقريني هالأهل ماكو إلا اسوي مأدبة بلوقية اعزمكم و كل المنيو انا اسوي و الأكل اجباري
- اما عن اليهال بالعرس شوفي انا الياهل عندي ماتروح عرس إلا اذا عمرها 15 و ماتسافر قبل ال 10 سنين نظام كل واحد شايل عمره
** شي از مي :
- يعني العروس واقفه عند المدخل و شعر و زفه و بنت اختها رايحه متمتحه عالكوشه و مسويه وقوف عالراس اهي صغيرة و مخلينها تحوس بالعرس
- ياستي كلشي بالمصاري ينحل ولو
** أتيت متأخرة :
- هلا بأهل البحرين انا اقول اشم ريحة لقاح مادري من وين لوول
وماخو فيه اعظم ياخويتي مشكلة اللي ياخذ مألب بعمره افشلون والله
** جندل :
- شفتي شلون والله انا مت من الحرة كان ودي احوكها طراق بس الشرهه موعليها الشرهه على اللي يايبها
و هابين بالأغاني العراقية عمة عين بليس يمين يسار و اشكرة لراح للبصرة و يرقصون عبي يعني شنو هالمستوى انتوا جدام الناس عيب جذي تسوون
والكيكة ماعليج من الشكل صدقيني انتي ذوقي اقصلج قطعة ؟ تكفين اكلي و اعطيج دينار
اسم البوست هذي غنية يدية حطوها يمكن مرتين بالعرس
** شاي الضحى :
- شوفي انا من شفت كيكتج الزرقه و انا محترة قلت هالبنت لازم اطيح سوقها بالطبخ تصدقين حتى جوى ما ضاقتها
انتي لاتشوفيني شلون فقدت و قمت اضحك لما قاموا يوزعون الموالح ابييه يحليلهم عالم آخر
** غير معرف :
- بعد عمري ماقصرتي بس يختج ساعات الناس يسوون اشياء غريبة يعني بنات من المعازيم يعني موقراب راقصين على كل العرس ليش كافي يا محمد مدتها نص ساعة والله صج مايتعبون ؟
** شيمونا :
- حياج الله يالغالية والله ساعات تروحين حفلات مشالله ماتدرين شنو تطالعين من فناتق و ديكور مو شرط شي غالي بس يكون سنع و مرتب هذا كافي على قولتهم يتزوجوون اثنين و يبتلون الفين
مشكورة عالمرور و زهبي الشاي و الكيكة زاهبة امرج سوووووون انشالله
هههههههه مبين ما تحبين العروس ..مقطعة كل اللي بالعرس ..من العروس لين المعازيم محد سلم ..
مابقى شي من الكيكة ودي اجرب ^^
ونسني البوست والله ..سانكيوزات عليه
** om harooby :
- ولكم ولكم حياج الله شفتي شلون مو انا رايحه بروحي ما اكو احد اقوله قلت اصير مراسلتكم من قلب الحدس
واااااااااااي مت مت
من الضحك .. الله يغربل بليسج
اصلا البوست يقطر اعصاب بس زي العسل
ولا العنوان .. شياب الطاري
و لي نويتي تروجين عرس عفية عفية
بقعد يمج :*
صبحج الله بالنويـــــر
*********************
اهلا اختي اسفرت وانورت
بص تبين الصج
الكيكه ما تشوق
p;
ولك بااااك
اي والله انا فاقدتج
واما العرس كل اللى قلتيه فيه صح
والاهم اغنية سواح او بنت السلطان
خخخخخخخخخ
و المكياااااج الاوفر لجميع المعازيم
ليش شاللى صاير في الاوااادم
؟؟؟؟؟
فيني عزوف عن الاعراس...من اللى اشوفه وما يعجبني .... ومابي استاثم
لوووول
اذا ما تين تعلمين المقادير
فلو سمحتي
طرشي لى وللزين كيكتين
من صنع اديك ياروح عنيه
ههههههههه
كله كوم وبنت اخت العروس كوم
loooooooool
الله لو انا العروس
اظنتي جان شايتتها من تحت الجيبون
:Pp~
ياربي هالاوادم استخفت بالعروس
بعرسي...في واحده يزاها الله خير استهبلت بالرقص جدامي
كل ما اشوف الشريط اموت من الضحك على ويهي
عباره عن علامة تعجب
!!
لوما الحيا جان قمت على طولي وقعدتها
ما قصرت ادت الواجب وزياده
:)))
** نور الدنيا :
- من صجج والله يطردونا لووول حق آثام احنه جذي موخالصين
** آرتفل :
- اهلا اهلا يا باشا منور يا فندم
واي عفيه لاتذكرني بواقعي المرير والله ليلحين متحسفة على الدينار و ربع قيمة الكيكة :(
** بنت الشامية :
- هلا بالزين كله حبيبتي عساج ماتفقدين غالي
انزين تبين طريقة الديكوريشن ترى هذي سكلوسف مو حق اي احد للغالين فقط
** استكانه ( عروستنا الحلوة ) :
- يا هلا بأحلى العرايس شلونج و شلون بوالشباب
شوفي اذا طلعت بالشريط ضبطي المقطع و سجلي عليه جنج ماتدرين لوول
هههههههههههههههه ضحكتيني ميمه على التعليقات والتحلطم
انا انقهر من اللي عايشه شبابها وترقص شرقي .. استغفرالله لا تعليق
بالعروس تشوفين اشكااااال والوااااان
انا من جذي كله قاعده بعد اخاف يحوشني تعليق بالغلط
وتسلم ايدج علكيكه حبيبتي :))
هههههههههه
" الفال لك " هههههه
عاد انا ف الاعراس لزقه ف ازواج خواتي...عشان ما احد يقولهم عقبالكم
لوووول....امزح
الناس اجناس...سبحان الله....
اهم شي انكم سويتوا الواجب و الله يجزاكم خير
تحياتي
ميمه الله يهديج مسويه زحمه والشارع فاضي :)
الحين كل اللفه الطويله العريضه من الملاحظات مو عشان اللي شفتيه .. بس عشان قالو حق ريلج الفال لك :P
وبعدين ماني خابرج نحيسه عشان تخشين على العالم مقادير كيكتج.. :P شفيج جذي قلبتي مره وحده .. :D
وبعدين وانا اخوج خلهم يرقصون بالاعراس ويطلعون حر مافيهم من هم وغم ونكد مو كافي معنسين وينطرون بس من يقول لهم (بخطب) عشان يفتكون ويقعدون بنفس المكان اللي قاعده فيه العروس (النحيسه) اللي قاعده ونافشه ريشها :P
صج استلمتي سيارتج اليديده..؟ اذا استلمتيها لو سمحتي اطرشين لنا الحلو لـ الجريدة.. :P
** فشه :
- هلا والله يالقاطعة شلونج .. ايه والله صاجة الناس صايرين غريبين والله لما اشوف جذي اقول الحمدالله عالعقل
والكيكة لن و لم تعاد مرة ثانية
** جنون عاقل :
- ايه والله اهم وايد خووش ناس طيبين حرام بس مادري يمكن طبايعهم جذي
والفال لك انشالله نفرح فيك و نشوف عيالك
** أحمد السلامي :
- لا والله مو نحسيه بس العيب مو بالكيكة بالديكوريشن اللي مايترقع اللي انا هببتا فوقها ولا هي كيكة قواطي عادية
والسيارة الله يخلي الوالدة متسلفين سيارتها لأجل ( ن ) غير مسى و للحين ماقرر شنو يبي ياخذ ننطر عروض الصيف و الله المستعان ياخويي
ههههههه
صج بدع بالعروس
و اكره شي من اللي ذكرتيه
اغاني سجودة والردح
استغفر الله نقعد ونعلق عالاشكال
و تسلم ايدج :)
مساء الخير ,, أحس العصبية بتطلع من البوست ^^"
الفطاير:
ترى فيه ناس يبدون بالمالح قبل الحلو آنا استغربت بس فيه عوائل معينة جذي طريقتها ..
بنت أخت العروس: أذكر قبل زليون سنة على دشة خالتي الصالحة كنت أقطع ورد من الكوشة ^_^
أغاني ساجدة: صاجة فشلة مو حلوة علني
رقص البنات: مو شرط ترى في بنات يحبون الرقص وتلاقينها كاشخة تبي تطلع كشختها وتحلل فلوس البدلة والمكياج والتسريحة
عمرج 60 سنة: لووووول مشالله فيها حيل الله يديم هالحيل عسى ما يصير فيها شي
زواج الأهل: ممممم صح صاجة بس مع الفحص أتوقع أمان
بعرس الرياييل: اي وقاحة !
,,
تسلم ايدج ع الكيكة
عجبني تنبيهك لخطورة الزواج من الاقارب. لانه يزيد فرص الاصابة بالامراضة الوراثية وخاصة لو كان السرطان منتشر. وهذي مشكلة الان في الخليج السرطان صار مثل الزكام بسبب زواج الأقارب. لكن لاحياة لمن تنادي.
تحياتي لك
Godless Saudi
** sweetheart :
- ماكو فايدة فيهم لو نكتب من اليوم لي باجر مايتسنعون .
** iconzzzzz :
- اهلان و سهلا نور البلوق
انا ما انتقد كل ناس لهم سلكهم بس اول مرة اصادف موالح بدشة العروس بالنسبة لي كان شي غريب
الكيكةالله لايراويج هذا انا مسويتلها 3000 فلتر و جذي شكلها استغفرالله ياختي موفالحة بشي انا بالمطبخ كلش
** godless :
- what ur nick name means ?
أهم شي ثامنا :)))
وقوف علراس شلون ؟ يديدة علينا هذي !
ههههههههه
أهم شي وقوف عالرأس
بدعتي بصرآحه
الله يسامحج جني هبله أضحك بنص الليل بروحي :)
مدونة رووعه :)
مبارك عليج الشهر وتقبل الله منا ومنكم صالح الاعمال
وكل عام وانت بخير
إرسال تعليق