الجمعة، 1 مايو 2009

هكذا الدنيا تدور ...

شنو لا مو صج خلود الجيكر تزوج نوال

الكل كان مستغرب شلون قدر خالد الجيكر المصعوي

يتزوج نوال
الموت الحمر شنو فيه زود عشان تتزوجه مع انه وحده بجمالها ممكن تاشر بس و الف واحد
يتقدم لها لأن جمالها كان خلطه من التقاطيع الروسية الصغيره بعيون زرق جنها ياقوت
وشعر اشقر سايح ( مو شعورنا الحمدالله و الشكر الكشه قايمة من كل صوب ) و لون
لافحته الشمس يعني جنها مسويه تان بس كان تان طبيعي و اهو يالله الينه كان معروف
بطيبته الزايده اللي البعض يسميها سذاجه و بالكويتي ثواله

معصقل اجلح و
املح و مافيه ولاشي حلو بس على قولة المثل الحب عميي

المهم صار العرس و
صاحبنا من كثر ما انه ماكان مصدق انه تزوجها قام الحبييب و هد لها الخيط و المخيط
اهيا الكل بالكل ولو بغت لبن العصفور يابه لها بحكم انه كان يشتغل بقطاع خاص و
الولد كان يملك شوية اسهم قدر انه يشتري بيت و يأمن مستقبل عياله اللي صار عددهم 4
ثلاث اولاد و بنت .

في يوم اغبر مرضت بنته مسكينه و اهو بحكم شغله ما قدر
اوديها الطبيب ف قال حق ست الحسن انتي وديها اليوم و انا احاول استأذن و اييلكم

قامت الأم و خذت بنتها الطبييب دشت وله هالدكتور السكبه حده جنتل طول بعرض
على ديرتي يعني الريال شغل دارس بامريكا و راد يا ارض انهدي معليكي ادي ، دشت كلمه
منها على كلمه منه يعني حصل شويت اعجاب بينهم قام الدكتور وحدد لها موعد متابعه
لحالة البنت بس النيه ماكانت متابعه البنت كانت متابعة الام والحلوه فهمت القصد
فحددت وقت اللي يكون فيه زوجها فقير الله بالدوام عشان تضمن انها اللي تودي البنت .

بدت شرارة الحب بينهم خاصة ان الزوج كان سلبي وماله كلمه بالبيت يعني
تقريباً كانت اهي الريال مع ان مسكين تصرفه كان بدافع الحب مو اكثر .

زادت
طلعانها تلفوناتها مالها خلق له من كل النواحي لما يه اليوم اللي تيله و تقوله خلاص
انا ما ابييك طلقني انصدم مسكين حاول بكل الطرق انه يعقلها بس للأسف كانت ترد عليه
بأبشع الألفاظ انته مو ريال خلاص ماقمت احس اني احتاجك كزوج والريال مسكين موعارف
شسوي حاول يقنعها بالعيال جان تقوله ما ابييك لا انت و لا عيالك خلهم عندك !!

صار الطلاق بعد العده بيوم سمع انها تزوجت الدكتور فهم القمنده و سبب
تصرفاتها و اهو المسكين الووووي بهاليهال من بيت امه لي بيت اخته موعارف شسوي فيهم
بس مع الوقت قدر يتأقلم مع وضعه اليدييد وعرف شلون يتعامل مع كل واحد من عياله اول
الأيام تعب من كثرة اسئلتهم عن امهم و ليش طلعت و خلتهم لكن مع الوقت نسوها و قدرت
يدتهم انها تملى ولو جزء بسيط من فراغ الام

بعد فتره شاف وحده يديده عندهم
بالدوام و لحسن الحظ انها ماكانت متزوجه وكانت عكس زوجته بنت عادية الملامح بسيطة
هاديه و خجوله و بعد فترة قرر انه يفاتحها و يقولها انه يبي يتقدم لها و ماننسى انه
والدته الله يطول بعمرها كانت شغاله عليه حنه تزوج و تزوج وعيالك انا اربيهم عزم
الريال .

رضت البنت و قبل ملجتهم بيومين ياله و لده لكبير و قاله يبه امي
تبي تكلمك وقالتلي اني اقولك تدق عليها لأن الموضوع ضروري ؟

استغرب شتبي
هذي الحين كلش مو وقته بس لما سمع طاريها شي داخل قلبه خفق على طول مسك التلفون ودق
عليها و اول ماردت قامت تبجي " انا اسفة انا غلطت بحقك و ماعرفت قدرك انخدعت قص علي
الشيطان و من هالحجي ...

بس خالد حس برجفه و قلبه قام يرقع مثل اول يوم
شافها فيه بالكلية .

سكت ما كان قادر اقول اي شي

قالتله انا ادري
انك راح تملج بعد يومين بس انا تطلقت و حرام تييب حق عيالنا مرت ابو و انا موجودة
فكر سامحني الله يسامح والله اعيش خادمه تحت ريلك بس ردني

اهو ساكت يسمعها
تعتذر و تبجي .. اهو يدري انه اهي الوحيده اللي حبها ولا عمره راح يحب وحده مثلها
بس بنفس الوقت رجولته و دموع عياله و اسئلتهم و شلون هانوا عليها لما قطتهم عشان
شهواتها و غرورها

لوسمحتي انا بعد يومين بتزوج اذا في شي يخص لعيال دقي على
تلفون راشد و اهو يبلغني و

عيالج قدروا اعيشون بدونج يمكن اللي راح تيي
تكون احن عليهم من امهم اللي قطتهم و لا درت عنهم .

انصدمت من رده كانت
تتوقع انه للحين الساذج اللي ممكن تاخذ منه اللي تبيه بدمعه او بدلع

تزوج
خالد و الله عوضه بزوجه صالحه تخاف الله فيه و بعياله و اهي للحين تتأمل انه ممكن
اردها في يوم من الأيام .


** القصة حقيقية مع تغيير الاسماء بعد تدرون
لكويت صغيرة **

هناك 13 تعليقًا:

الزين يقول...

قلعتها

مي كفو وناكره للجميل

شاخت بجمالها على الريال ونست ان جمالها آفل ومردها بتعيز

واللي يبقى المحبة والألفة والتراحم

ميمة السبيت يقول...

يابعد عمري يالزين يحسبين كل الناس مثل نقاوتج و روحج الحلوه ..

لوتسمعين سوالف الناس يشيب شعر راسج بس والله ولهت عليج و على تعليقاتج الحلوه ..

ياملكت المدونات اتمنالج ويكند حلو مثلج

رورو الشخبوطه يقول...

السلام..

لو رادها جان انتحرت ..

تستاهل هذا جزا اللي تخون وتركض ورا نزواته..

يمكن جماله ع قولتج ميزه بس شفايدته مدام مافيه اخلاق ..

خوش قصه ..

مشكوره..

ميمة السبيت يقول...

مشكورة يا رورو و حياج الله في مرورج الأول ...

للأسف في ناس وايد تنخدع بالمظاهر و لو كان رادها جان انا غسلت شراعه

Nikon 8 يقول...

في حريم ما تقدر النعمة اللي بين إيدها .... ومثلنا يقول ما تعرف إقديري لين تجرب غيري .
قصة جميلة
سررت بزيارة مدونتك :)

ميمة السبيت يقول...

ايه والله صدقت ياخوي ناس وايد ماتقدر النعمة


حياك الله و انشالله ماتكون اخر مرة

ReLaaaX يقول...

سبحان الله !

اي والله هكذا الدنيا تدور

ميمة السبيت يقول...

على قولة يدتي رحمة الله عليها

من سوه سويله

حياج الله يالغالية :)

ANGEL HEART يقول...

زين تعلم الدرس وماشترى اللي باعه

تحياتي:)

ميمة السبيت يقول...

اقولج سر اهو تقريبا خق و بقى يكنسل زواجه بس رد لعقله بأخر لحظة و احنا ندري مو من قلبه ..

تدرين مالحب إلا للحبيييب الاولي

** مشكورة عالمرور و حياج الله :)

ARTFUL يقول...

شنهو هذا تسويق حق الجياكر؟؟

p;

ميمة السبيت يقول...

عاد صج مسكين حده جيكر بس والله خوش ولد حرام اللي صار له :(

The.One يقول...

الحمدالله الله عوضـه

ومشكوورة