الأربعاء، 25 مايو 2011

للرجال مع التحية :)

** النوع الأول :
- الحبيب يلوّث من لبنان لي تايلند لي المغرب لي زحير يزحر مخه و مومخلي سحيله و محيله مومكلمها و نايم نوووووم بالتلفوووون و ستين خط عنده و فقيرة الله اللي ماخذها
بطلع مع رفيجاتي = ممنوع ، بسافر مع أهلي = ممنوع ، بسوي ليزر = ممنوع , بعزم اهلي بالبيت = ممنوع
المشكلة و الللي يقهر انها والله بنت ناس و سنعه و موناقصها شي بس العوابه شلوووون صايره
- الله ياخذك انشالله و يفكنا من أرفك على قولة امي حليمة : كل من يرى الناس بعين طبعه
=============================

** النوع الثاني :
- ابي سيارة = ماعندي ، بروح السوق= ماعندي , نبي أغراض من الجمعية = مالي خلق , الحمام مافي ليت = قولي حق سايق بيتكم اسويه
سؤال منو ال....... اللي شار عليك تتزوج انت حدك جيس بنك و منيطل بالدوانية و علب كنتاكي واصله لي السكة

============================

** النوع السالس :
- اشرايك نغير دارنا = الو يما اشرايج نغير غرفتنا النوم ، خل نروح نينو نتعشا = الو يما نينو حلو أكله ،
وين بنسافر السنه = يما تيين ويانا
أقووووول تسنع لا اردك بطن امك اوكي يا حلاتي و انا ساكته

===========================
** النوع الرابع :
- حبيبتي ترا حجزتلج ميسوني تونايت بس انا و انتي !! حبيبتي شريتلج جنطه ديوووور !!! حبيبتي مسويلج مفاجأه باجر بنسافر !!
حياتي جنه نفسيتج تعبانه اشرايج تروحين يومين دبي تسوين شوبنق و تردين !!!!!!!!!!!!!!!!!!!!!!!!!!!!!!
لا ياقلبي لاتشترين شي من معاشج حق البيت معاشج حقج بس استانسي فيه !!!!!!!!!!!!!
* عفيه هذا وينه لا لحظه الظاهر هذي حلقه تركية و انا ضربت فيوزاتي

=============================

عفيه تكفوووووووووووووون عتقونا شوي ترا لاعت جبدنا بسسسس عيزت اقولهم خلو العقدخمس سنين و يراجع بس ماطاعوني
اني وي نصيحه يا ايها الرجل يا بوكرشه لاتخليها تنفجر و تطشرك انت و عيالك ديير بالك

هناك 18 تعليقًا:

ARTFUL يقول...

وترا في العكس

تلاقي الريال يساعدها ويعاونها

وهي ولا بالبال!!!!

صباح الخير

:)

bent el deera يقول...

لوووووول
حسيت بوست اليوم برعايه طز بالرجاله هههه

ميمة السبيت يقول...

** آرتفل :

- هلا بالعضيد طبعا طبعا طبعا طبعا طبعا طبعا طبعا

ميمة السبيت يقول...

** بنت الديره :

- لا بس هذا الشايع هالأيام و ما خفي أعظم

t7l6m.com يقول...

حرام عليج ميمه
ترى وايد باشات وغلامات من النوع الرابع
أصلا اللي من النوع الأول إلى السالس مو رياييل
عموما ضحكتيني وأكيد في مدعين الذكورة والرجولة هذي سوالفهم

chandal/danchal!! يقول...

لووووووووول
هلاو هلاو ميومة مشتائين

والله انج احلا من الكرنيشن اللي قاعدة اقند فيه راسي

النوع السالس ذكرني بعدولة ولد خالتي قماشة.. الله يرحمه خليل اسماعيل حبيب
حسرت فيه مريم الصالح وكانت ما تناديه الا دياية امك ودلوع امك لوووووووووووول


سؤال البوست
هل كل دياية امه، امه تكون نسرة؟



تحياتي للوالدة وان شاء الله تكون باطيب حال
سلام يا صاحبي

نمووول يقول...

النوع السالس 100% تبين تخوفينه قوليله اعلم امك عليك :)
سالفة يقولي ياها زميل باصلاح ذات البين يقول بعد ما قعدناهم مع بعض وهدينا النفوس وصالحناهم دقت عليه امه ورد يقول خلاص بطلقها .... عليك وعلى امك ؟


النوع الرابع موجود بخيال كل بنت بفترة الخطوبة

النوع مجرد اشاعات ماعندنا هالنوع من الرجال تايلند يروحون لها تجارة ولبنان جهاد ضد اسرائيل :)

ونبي موضوع للنساء مع التحية لو سمحتي ,,

مساءك سُكر ..

سلة ميوّة يقول...

هههههه
اخر نوع يصير استعيره حق القصة الياية؟؟؟


ياحلوج وياحلو بوستاتج:***

ميمة السبيت يقول...

** تحلطم :

- اي صح في وايد بأحلامنا بس الله يعينا و يعيين كل مسلمة مبتلية في بو كرشه

شكرا للزيارة و سجلوني متابعة لمدونتكم الحلوة :)

ميمة السبيت يقول...

** جندووولة :

- هلا بالطيب الغالي عزيييز و شوفتج يا جندووولة منوه

سكتي سكتي بزووووووووووووووع من هالسالفة باقي واحد يسألها بس ماقدر اكتبا ريتددددددددد

ميمة السبيت يقول...

** نموووووووووووووووووووووووووول :

- هللووووووووووو شلونك شخبارك ولهت عليك

تكفه ياليت بس هالانواع في اردا بس اللي يشوووف بلوة غيره تهون عليه بلوته

ميمة السبيت يقول...

** سله :

- هلا بالحب انتي يبا استعيري النووع و البلووووق كله انتي تأمري يا دكتوووووور وصلي سلامي حق د.حموووود

Ahmed Al-salami يقول...

وانا اخوج للاسف الشديد معظم الرجال هذا تفكيرهم وهذي حياتهم فعلاً.. والزوجة هي المسؤولة الاولى والأخيرة عن كل شي يصير في البيت.. أما النوع المهم من الرجال (ولد امه) فهذا مشكلته مشكلة.. لا يحل ولا يربط ولا يعرف يركب جمله على بعضها إلا بشور امه..! أما النوع التركي.. فهو للاسف عملة نادره.. وانا اؤيد فكرة العقد يكون مشروط بعدد من السنوات بعدها كل واحد يراجع نفسه.. :P
خاصة اذا كان احد الطرفين شين والثاني زين..

لكن تدرين الحمدلله اني للحين عزوبي.. ومرتاح في حياتي لا ازعاج ولا لويه وحياتي كلها شغل × شغل.. :)

Sweet Revenge يقول...

ميمة الرابع هذا فصيلة نادرة
الي تحصلة المفروض تستنسخ منه لاسعاد بنات جنسها الانانية موزينة p:
منور ياجميل :)

ميمة السبيت يقول...

** أحمد السلامي :

- من صجك يراجع نفسه إلا يقول عوووووووووووووووووووووووووووووووع مابي بس مابي الزواج بكبره و انا اختك خلك جذي شاري راسك لين يصير عمرك 45 تزوج و ييبلك ياهل تستانس في قبل لايحوووووشك

ميمة السبيت يقول...

** سويت ريفنج :

- هذا اللي تصيده تحطه بقفص فوق الصطح محد يشووووفه اهو ريلج عوبه و لاعن خيرج و حاسدينج تخيلي بعد هالنوووع شيصير

Fishah يقول...

ياحلوو النوع الاخير يا ميمه .. جان زين كل الرياييل يقلبون جذي .. جااااااااااان وناااااااسه هههههههه

الحمدالله على كل حال يا ام جوجو :>

شخبارج :)

ابن السور يقول...

يبدو ان الرمز هنا هو ابو كرشه
هذا الشخص الذي تتغير صورته في كل فقرة .. لكنه يطل بذات الكره غير المخفي من الكاتبة
هذا مهم .. علينا ان نفهم اكثر ان ابوكرشه ليس شرطا ان يكون انسانا .. قد يكون موقف او حالة او قضية .. انها اشبه بالكرشه التي ممكن ان تنفجر ..
ميمة السبيت لا نميل لها كثيرا في لعبة الكوت .. وهذه اللعبة يعرفها اهل الكويت .. لكن هنا ميمة السبيت مختلفة
انها تشع جمالا .. و .. امتاعا بالحرف .. وعذوبة بالفقرات .. وفن بالمعاني .. ومرح بالعرض
تابعوها .. هي رائعة